Ek naya jahaan

Yaad hai ab bhi
Is prangan me rakha apna pehla kadam
Apne mezbano ki shararti najron se bachti
Hasrat bhari nighaon ne jab dekha tha.
Apna naya aashiyaan

Kai umeedien thi ,dil me ek josh tha
Hazaar khwahishein thi ,par aankhon me hosh tha
Thi aasman ko chhune ki chahat
To dhara k sneh ka aanchal
Ab bhi mere baalon ko sahla raha tha

Sapno ko pane ka ek anjana ehsaas tha
To ek darr bhi tha,ki ,kya ho paunga main shaamil
Is pratiyogitatmk masti k mahakumbh me?
Jahaan har chehra hai ek mukhaute me maujood
Kya dikh payega kahin
Mera nanha sa wajood

Fir na jane wo baatein kahaan bhul gayi
College suru hui aur ik nayi duniya khul gayi
Raat ko yaaron k saath thhaake lagana
Aur subah ki classes me neend farmana
Aur is fasaane me jura ek naya afsaana
Jab CSC aur NESCAFE bana apna thikana

Khub khela, khub nacha,khub gaya ,khub masti kya
Par kuchh hi dino me laga, arey! Ye kya kia?
Seniors ki salaah aur ye duniya tab samjh aane lagi
Jab proffesors ki baatein dimaag k upar se jane lagi

Khushkismat tha ki waqt rehte samjh aa gaya
Is hariyali ki thandi chhanv k pichhe
Surya ki bebaak kirane ab bhi maujood hai

Hai ye khubsurat raahein
Apni manjil ka jariya
Hai samudra ki khwahish
Abhi to bas paya hai ik dariya

Par kuchh hi dino me
Jaise kar liya kai saddiyon ka safar
Hasti rehti har pal ye aankhein
Kuchh aisa hai asar

Dil me ab darr nahi
Khushiyon ka ehsaas hai
Jo tha kabhi khwabon me
Wo jahaan aas-pass hai

Sach pata hi nahi chala
Kab ban gaya main is parivar ka hissa
Kab mann k chaman me
Ek naya gul khil gaya
Aur kab , kahaan, kaisi,..
Kis pal kis lamhe me ...Ek naya aashiyan ,ek naya jahaan mil gaya